काठमाडौँ । जेनजी आन्दोलनपछि सरकार गठन भएको एक महिना पूरा भएको अवसरमा राष्ट्रिय एकता अभियानले मंगलबार काठमाडौँको माइतीघर मण्डलामा भ्रष्टाचारविरुद्ध प्रदर्शन गरेको छ । भ्रष्टाचार अन्त्य तथा सुशासनको माग राखी भदौ २३ गते र २४ गते भएको आन्दोलनपछि सुशीला कार्कीको नेतृत्वमा भदौ २७ गते सरकार गठन भएको थियो ।

आन्दोलनले उठाएको माग पुरा गराउने दबाबका लागि सो प्रदर्शन गरिएको राष्ट्रिय एकता अभियानका संयोजक विनय यादवले बताए । वर्तमान सरकारले भ्रष्टाचार छानबिनमा देखिएको ढिलासुस्ती र निष्क्रियताबारे खबरदारी पनि गरेको छ । प्रदर्शनकारीहरूले “पोखरा एयरपोर्टका भ्रष्टाचारीलाई कारबाही गर”,  “भुटानी शरणार्थी फाइल सार्वजनिक गर”, “टेरामेक्स घोटालाबाजलाई जेल हाल”, “केन्टोमेन्ट घोटालाको हिसाब दे” लगायतका नाराबाजी गरेका थिए ।

यो प्रदर्शनले नागरिक समाजको निगरानी र दबाब अझ तीव्र भएको सन्देश दिएको छ र नागरिक सरकारमाथि पारदर्शिता र जवाफदेहिताका लागि थप दबाब सिर्जना गरेको उनले बताए ।