माया–प्रेममा आधारित नयाँ गीत ‘खान्छ मन कटक्कै’ सार्वजनिक भएसँगै दर्शकको उल्लेखनीय साथ पाउन सफल भएको छ। सार्वजनिक भएलगत्तै म्युजिक भिडियोले राम्रो चर्चा बटुल्दै सामाजिक सञ्जालमा लोकप्रिय बन्दै गएको छ। नयाँ र उदीयमान कलाकारलाई निरन्तर साथ सहयोग गर्दै आएका निर्माता रुद्र नेपालले यस गीतबाट आफू सन्तुष्ट रहेको बताएका छन्। गीतको टिमवर्क र दर्शकको सकारात्मक प्रतिक्रियाले आफूलाई उत्साहित बनाएको उनको भनाइ छ। गीतमा गायक अर्जुन सापकोटा र पछिल्लो समयकी भाइरल गायिका मिठु चेपाङको स्वर रहेको छ। नेत्र अर्यालको शब्द, बिन्दु परियारको लयले गीतलाई अझ प्रभावशाली बनाएको छ। म्युजिक भिडियोको निर्देशन तथा कोरियोग्राफी बिक्रम चौहानले गरेका छन् भने भिडियोमा बिजय पुन र बिन्दु परियारको अभिनय देख्न सकिन्छ।