विपद्बाट प्रभावित घरपरिवारलाई राहत व्यवस्थापनमा कुनै कमी हुन दिँदैनौँ: विपद् प्राधिकरण
काठमाडौँ । राष्ट्रिय विपद् जोखिम न्यूनीकरण तथा व्यवस्थापन प्राधिकरणले विपद्बाट प्रभावित घरपरिवारलाई राहत व्यवस्थापनमा कुनै कमी हुन नदिने जनाएको छ । बुधबार सिंहदरबारमा राहत व्यवस्थापनसम्बन्धी बैठकमा सरोकारवाला निकायसँग छलफल गर्दै प्राधिकरणले बढी प्रभावित इलाम र झापाका साथै अन्य जिल्लाहरूमा पनि प्रभावकारी ढङ्गले राहत व्यवस्थापन गरिने जनाएको हो ।
प्राधिकरणका कार्यकारी प्रमुख दिनेश प्रसाद भट्टले प्रशासन कार्यालयका साथै सबै निकायको समन्वयमा राहत व्यवस्थापनको कार्यलाई अघि बढाइने र कतै कमी तथा कतै दोहोरोपनको अवस्था आउन नदिने बताए ।
प्राधिकरणले यसअघि नै प्रदेशलाई हस्तान्तरण गरिएका विपद् व्यवस्थापन सम्बन्धी गोदाम अहिले प्रयोगमा आएकाले उक्त गोदाममा कुनै कमी हुन नदिन आवश्यक समन्वय गरिने उनले उल्लेख गरे ।
प्राधिकरणका अनुसार असोज १७ देखि २० गतेसम्म भएको वर्षापछि आएको बाढी पहिरोका कारण हालसम्म ५३ जनाको मृत्यु भएको छ । जसमध्ये पहिरोका कारण ४०, बाढीका कारण ११ र चट्याङबाट २ जनाको मृत्यु भएको छ । त्यस्तै बाढीमा ५ जना बेपत्ता भएका छन् ।
वि.सं.२०८२ असोज २२ बुधवार १६:४१
