काठमाडौं । भौतिक पूर्वाधार तथा यातायात मन्त्रालयले आगामी दिनमा उत्पन्न हुन सक्ने विपद्को जोखिमलाई मध्यनजर गर्दै सडक विभाग मातहतका सम्पूर्ण कार्यालयहरूलाई उच्च सतर्कता अपनाउन निर्देशन दिएको छ। मन्त्रालयले विज्ञहरूको विश्लेषण र राष्ट्रिय विपद् जोखिम न्यूनीकरण तथा व्यवस्थापन प्राधिकरणले जारी गरेको सूचनालाई आधार मानेर आफ्ना सबै डिभिजन प्रमुख तथा योजना प्रमुखलाई कार्यालयका इन्जिनियर र अपरेटरसहित कार्यक्षेत्रमै सुरक्षित रूपमा उपस्थित रहन आग्रह गरेको हो।

मन्त्रालयले जारी गरेको निर्देशनमा भनिएको छ, ‘विपद् पछि चाहेर पनि कार्यक्षेत्रमा पुग्न नसक्ने अवस्था आउन सक्छ, त्यसैले अग्रिम तयारी स्वरूप आफ्ना स्थानमा सुरक्षित पुगेर ब्याकअप प्लान सहित सम्भावित विपद्को लागि तयार रहनु बुद्धिमानी हुनेछ।’