सुर्खेत । सुर्खेतस्थित कर्णाली प्रदेश अस्पतालमा एक सुत्केरीको मृत्युको विषयलाई लिएर आफन्तले विरोध जनाएका छन् ।

सुत्केरी ब्यथा लागेपछि आइतबार बेलुकी प्रदेश अस्पतालमा भर्ना भएकी वीरेन्द्रनगर नगरपालिका–६ कि १९ वर्षीया शर्मिला सुनारको सोमबार बिहान पौने ३ बजे मृत्यु भएको थियो । अस्पतालले उनलाई रक्तस्राव बढी भएको र आईसीयूमा राखेर उपचार गरिको थियो ।

आफन्तहरूले भने सुत्केरी व्यथा लागेपछि सामान्य अवस्थामै अस्पतालमा भर्ना गरिए पनि चिकित्सकको लापरबाहीका कारण मृत्यु भएको आरोप लगाएका छन् । मृत्युपछि शर्मिलाका आफन्तहरू अस्पताल परिसरमा प्रदर्शन गरेका छन् ।

अस्पताल परिसरमा बाक्लो मात्रामा प्रहरी परिचालन गरिएको छ । मृतकका आफन्तहरूसँग छलफल भइरहेको जिल्ला प्रहरी कार्यालय सुर्खेतका डीएसपी वीरेन्द्रवीर विश्वकर्माले जानकारी दिए । ‘अहिले आन्दोलन अलि शान्त भएको छ । मृतकका आफन्तहरूसँग छलफल भइरहेको छ’, उनले भने ।