१७ भदौ, काठमाडौं ।

प्रमुख विपक्षी नेकपा एमालेले दार्चुला घटनालाई थामथुम पार्न र जनताको ध्यान अन्यन्त्र मोड्न खोजेको बताएको छ।

घटनाबारे छानविन समितिको प्रतिवेदन समेत अपष्ट भएको बताएको छ ।

प्रवक्ता प्रदीप ज्ञवालीले बिहीबार एक विज्ञप्ति जारी गर्दै संवेदनशील घटनाका सम्बन्धमा भारतीय पक्षसँग जानकारी लिने, सोधपुछ गर्ने र आपत्ति जनाउने सामान्य औपचारिकता र कूटनीतिक पहलसमेत गर्न नसकेको बताएका छन् ।
साउन १५ गते भारतीय सीमा सुरक्षा बल (एसएसबी)का जवानले तुइनको तार फुस्काइदिँदा जयसिंह धामी महाकाली नदीमा खसेका थिए । घटनाबारे छानविन गर्न बनेको समितिले बुझाएको प्रतिवेदनमा एसएसबीको उपस्थितिमा घटना भएको भनिएको छ ।
एमालेले विज्ञप्तिमार्फत सरकारको यस्तो लाचारीप्रति खेद व्यक्त गर्दै सत्यतथ्य सार्वजनिक गर्न र दोषीलाई कारबाही र पीडित परिवारलाई न्याय दिन माग गरेको छ ।