काठमाडौँ । भारत र नेपालबिच सर्किट टुरिजमको कार्यान्वयनलाई प्रोत्साहन गर्न उत्तर प्रदेशको प्रयागराजमा महाकुम्भ २०२५ को प्रवर्द्धन गरिने भएको छ । त्यसको विषयमा नेपालस्थित भारतीय राजदूतावासले नेपाल पर्यटन बोर्डको सहकार्यमा मंगलवार एक कार्यक्रमको आयोजना गरेको छ ।

कार्यक्रममा संस्कृति, पर्यटन तथा नागरिक उड्डयन राज्यमन्त्री अरुणकुमार चौधरीले नेपालको पर्यटनमा विशेषगरी स्थलमार्गबाट हुने अन्तर्देशीय पर्यटनको ठुलो योगदान रहेको धारणा राखेका थिए । उनले नेपाल–भारतले दुर्गम क्षेत्र सुदूरपश्चिम प्रदेशमा अन्तर्देशीय कनेक्टिभिटिमा ध्यान दिनुपर्ने सुझाव पनि दिएका थिए ।

नेपाल पर्यटन बोर्डका प्रमुख कार्यकारी अधिकृत दीपकराज जोशीले नेपाल भ्रमण गर्ने विदेशी पर्यटकहरूको सबैभन्दा ठुलो स्रोत भारत रहेको धारणा राखेका थिए । नेपाल पर्यटन बोर्डले नेपाल–भारत पर्यटन प्रवर्द्धनका लागि गरेका विभिन्न पहलहरूबारे पनि आफ्नो धारणा राखेका थिए ।

भारतीय दूतावासका कार्यवाहक राजदूत प्रसन्न श्रीवास्तवले भारत र नेपालबिच पर्यटनमा उच्चमा वृद्धि भइरहेको बताउँदै भौतिक र डिजिटल कनेक्टिभिटीमा भएको विकासबारे जानकारी गराएका थिए । नेपालका विभिन्न ठाउँ तथा भारतका छिमेकी राज्यमा रहेका धार्मिक तथा सांस्कृतिक सर्किटहरुको प्रवर्द्धनमार्फत भारत–नेपाल पर्यटन क्षमताको पूर्ण सदुपयोग गर्न दुवै पक्षले निरन्तर प्रयास गर्नुपर्ने कुरामा उनले जोड दिएका थिए ।

उत्तर प्रदेशकी पर्यटन अधिकृत कीर्तिले नेपाली भक्तहरूका लागि कार्यक्रमको महत्वबारे जानकारी दिँदै महाकुम्भ २०२५ को विषयमा पनि आफ्नो प्रस्तुति दिएकी थिइन् । सम्मेलनमा भएको बीटुबी कार्यक्रममा भारतका १३ प्रतिनिधि र नेपालका ६० जना टुर अपरेटरहरूको सहभागिता थियो ।

विशेषगरी स्थलमार्ग हुँदै अन्तर्देशीय पर्यटन प्रवर्द्धन गर्ने विषयमा छलफल भएको थियो । रामायण र बुद्ध सर्किटको सन्दर्भमा दुवैतिरका टुर अपरेटरहरूले दुवै देशका पर्यटकहरूका लागि सम्भावित यात्रा योजनाहरूको बारेमा विचार विमर्श भएको भारतीय दुतावासले जनाएको छ ।