काठमाडौं । प्रधानमन्त्री केपी शर्मा ओलीले नयाँ चिनियाँ एआई च्याटबट डीपसीकले विश्वभर तहल्का मच्चाएको टिप्पणी गरेका छन्।

बिहीबार भृकुटीमण्डपमा आयोजित औठौँ चेम्बर अफ कमर्शको एक्स्प्रोलाई सम्बोधन यसले स्थापित एआईलाई चुनौती दिएको बताए।

हङकङका मार्सल खेलाडी ब्रुस ली जस्तै सबैलाई ढालीहाल्ने तरिकाले आएको प्रधानमन्त्री ओलीको भनाइ छ। ‘अहिले जुन एआई आएको छ। च्याटजीपीटी, अरु इत्यादी एआईलाई निकै संकटग्रस्त बनाएको छ,’ उनको भनाइ छ, ‘किनभने त्यो धेरै गुणा महँगो, यो धेरै गुणा सस्तो। कमसेकम १५ गुणा सस्तो भएको हुनाले यसले बजार लिने सम्भावना देखिन्छ।’

ओलीले अगाडि भने, ‘यो ब्रुस ली जस्तो आयो क्या। ज्यान स्यानो छ, झट्याङझुटुङ हानिहाल्छ, ढालीहाल्छ खालको।’

अचानक आएर २४ घण्टामै यो स्थापित भएको उनको भनाइ छ। ‘अचनाक आयो, आइसक्दाखेरी तहल्का मच्चायो,’ प्रधानमन्त्री ओलीले भने, ‘२४ घण्टामा विश्वव्यापी परिचय स्थापित गर्‍यो र एआई क्षेत्रमा झट्का दियो।’

अहिले आफूहरू उपभोक्ता मात्रै भएको भन्दै उनले जुन सस्तो हुन्छ, त्यही प्रयोग गर्ने बताए। ओलीले भने, ‘जसले गरोस्, हामी त उपभोक्ता हौँ अहिले। हामीलाई सस्तो चाहिएको छ।’