जापानी अभिनेता हारुमा मिउराद्वारा आत्महत्या
एजेन्सी । जापानी अभिनेता हारुमा मिउराको निधन भएको छ । ‘अटैक अन टिटन’, ‘किमी नी तोडोके’ मा निभाएको भूमिकाका लागि परिचित अभिनेता हारुमाको शनिबार मृत्यु भएको हो ।
३० वर्षीय अभिनेताले आत्महत्या गरेको हुनसक्ने प्रारम्भिक अनुमान छ । टोक्योस्थित उनकै अपार्टमेन्टमा अचेत भेटिएका उनको अस्पताल लग्नेक्रममा मृत्यु भएको हो । तर उनको मृत्युबारे भने कुनै ठोस कारण पत्ता लागिसकेको छैन् ।
प्रहरीले उनको मृत्युबारे अनुसन्धान गरिरहेको जनाइएको छ ।
मिउराले टिभीबाट अभिनय यात्रा सुरु गरेका थिए । उनले सन् १९९७ मा एनएचके टिभीको ‘अग्री’ नामक नाटकबाट अभिनय यात्रा सुरु गरेका थिए ।
उनले सन् २००६ मा चलचित्र ‘क्याच अ वेभ’बाट चलचित्रमा डेब्यू गरेका हुन् । त्यसपश्चात सन् २०१० मा ‘किमी इन तोडोके’, सन् २०११ मा ‘टोकियो पार्क’, र ‘टिटन’ मा अभिनय गरेका थिए ।
उनको पछिल्लो चलचित्र ‘लिटल नाइट्स, लिटल लभ’ सन् २०१९ मा आएको थियो ।
चलचित्रसँगै उनी टेलिभिजन ड्रामामा पनि उतिकै सक्रिय थिए । रंगमञ्चमा पनि उतिकै सक्रिय मिउराले पछिल्लो समय गायनमा पनि करियर सुरु गरेका थिए ।
सन् २०१९ मा ‘फाइट फर योर हार्ट’ शीर्षकको एकल गीत रिलिज गरेका उनको अर्को गीत जुलाई २३ मा रिलिजको तयारीमा थियो ।
वि.सं.२०७७ साउन १० शनिवार ११:३८
