धनकुटामा गाईजात्राको रौनक

नेवार समुदायमा दिवंगत परिवारका सदस्यको तस्बिर, गाई, कुमारी, कन्या र लाखे नाच तथा विभिन्न झाँकीसहित बजार परिक्रमा गर्ने चलन छ । धनकुटा–७ को श्रीवनीमा भेला भएर बजारका विभिन्न भागको परिक्रमा पछि सम्बन्धित घरमा पुगेर परम्परागत रुपमा जात्राको विधि गरिने स्थानीय राजेश्वर श्रेष्ठले बताए । भाद्र कृष्ण प्रतिपदादेखि कृष्ण जन्माष्टमीसम्म गाईजात्रा मनाउने गरिन्छ । दिवंगत भएका व्यक्तिको घरबाट निकालिएको गाईजात्रा श्रीवनीमा भेला भएर सामूहिक रुपमा बजार परिक्रमा गरिएको थियो ।

नेवार समुदायको बाहुल्य रहेको धनकुटा बजार क्षेत्रमा यो चाड धुमधामले मनाइन्छ । यस वर्ष धनकुटा बजार क्षेत्रबाट नेवार समुदायका १८ जनाको निधन भएको नेवाः दे दबुका नगर अध्यक्ष रोशन श्रेष्ठले जानकारी दिए । जात्राको मुख्य आकर्षणमा घिन्ताङकिसी, तमाचाहालगायत मुख्य थिए । २० फिट अग्लो उक्त तमाचाहा बजारमा घुमाउँदा विद्युत तथा टेलिफोनको तार भने बाधक हुने गरेको सहभागीले गुनासो गरे । यसैबीच, पछिल्लो समय पहिले बजारमा पनि नेवार समुदायले मौलिक पर्वजात्रा मनाउन थालेको झिगु नेवा समाजका अध्यक्ष दिजेश शाक्यले बताए । धिमे बाजा, झ्याम्टा, ठ्याक्ठुके लगायतका नृत्य तथा बाजासहित जात्रा मनाउने गरिन्छ ।