मुगु । मुगु सामूहिक हत्या प्रकरणको अनुसन्धानमा खटिएका प्रहरी परस्कृत भएका छन् । मुगुमा भएको ४ जनाको सामूहिक हत्या प्रकरणमा अनुसन्धान गर्ने प्रहरी टोली र प्रहरी नायव उपरीक्षक वीरेन्द्र थापालगायत अन्य प्रहरी कर्मचारीलाई सम्मान गरेको हो । जिल्ला प्रहरी कार्यालयसहित १० जनालाई सम्मान गरेको हो ।

प्रहरी निरीक्षक प्रकाश सिंह कार्की, प्रहरी निरीक्षक भुपेन्द्र कुमार बुढाथोकी, प्रहरी नायव निरीक्षक भानदेव जोसी, प्रहरी सहायक निरीक्षक देवेन्द्र चन्द, प्रहरी जवान दिपक बुढा, चन्द्र रावत, खेमबहादुर थापा, सुस्मिता हमाल र प्रहरी सहायक हवल्दार हस्तबहादुर बुढालाई जिल्ला समन्वय समितिका प्रमुख मञ्जन बहादुर कार्कीले सम्मान गरेको जिल्ला समन्वय समिति मुगुले जनाएको हो ।

सम्मान कार्यक्रममा बोल्दै प्रमुख कार्कीले सुक्ष्म ढंगबाट गई छिटोछरितो, शान्ति र स्थानीय जनतामैत्री भएर सामूहिक हत्याको अनुसन्धानमा खटिइ हत्याको कारण र हत्यारा पत्ता लगाउन सफल भएको भन्दै सम्मान गरिएको बताए । गत कात्तिक १० गते मुगुको छायाँनाथरारा नगरपालिका–६ मन्दुकी २८ वर्षीया श्रीदेवी बोहोरा, उनका ११ वर्षीय छोरा मनोज, ८ महिनाका छोरा रहर र ८ वर्षीया छोरी अप्सराको हत्या भएको अवस्थामा घरभित्रै शव फेला परेको थियो ।