१६ माघ, दाङ । घोराहीको सडकमा अलपत्र फेला परेकी एक महिलाबाट जन्मिकी बालिकाको चार महिनापछि सामूहिक न्वारन गरिएको छ ।

मानव कल्याण समाज सेवा घर, शाखा कार्यालय नारायणपुरमा न्वारन गरी बालिकाको नाम ‘श्रद्धा’ राखिएको हो ।

गत साउन महिनामा घोराहीमा अलपत्र फेला परेकी महिलाको उद्धार गरी मानव कल्याण समाज सेवा घर, शाखा कार्यालय नारायणपुरमा राखिएको थियो । ती महिलाको स्वास्थ्य जाँच गर्दा सात महिनाको गर्भ रहेको खुलेको थियो ।

एचआईभी पोजेटिभ ती महिलाले असोज २० गते राप्ती स्वास्थ्य विज्ञान प्रतिष्ठानमा छोरी जन्माएकी थिइन् । बालिकाको जन्म पछि पनि उनलाई लगातार २७ दिन अस्पतालमा राखेर उपचार गरिएको थियो । तर आमाको मानसिक सन्तुलनमा सुधार आएको छैन । स्वास्थ्य परीक्षणको क्रममा ती बालिकामा पनि यौन सम्बन्धी समस्या देखिएको छ ।

त्यसैले चार महिनापछि मात्रै मंगलबार माघ १५ गते मानव कल्याण समाज सेवा घरको प्रांगणमा न्वारन गरिएको हो । ‘छोरीको न्वारन भइरहँदा भित्र रहेकी आमालाई कुनै सरोकार थिएन किनकि उनको मानसिक सन्तुलनमा प्रगति भएको छैन ।

आफूहरुले आमा–छोरी दुवैलाई स्याहार सुसार र उपचार गरिरहेको सेवा घरकी कार्यक्रम संयोजक सुस्मिता मानवले बताइन् । उनका अनुसार नाम–ठेगाना केही खुलेको छैन । ‘आमाको नै पहिचान नभएपछि बाबुको झन् पहिचान हुने कुरै भएन,’ संयोजक सुस्मिता मानवले भनिन् ।

मानव कल्याण समाजका केन्द्रीय सचिव विजयकुमार पोख्रेलका अनुसार बेवारिसे अवस्थामा फेला परेकी ती महिलालाई ‘सोनिया’ नाम दिएर संरक्षण गरिरहेको छ । उनको बोलीमा हिन्दी लबज मिसिन्छ । ती महिलाले केही अंग्रेजी शब्द पनि उच्चारण गर्छिन् । त्यसैले उनी पढेलेखेकी हुनसक्ने पोख्रेल बताउँछन् ।

पूर्व सञ्चार तथा सूचना प्रविधि मन्त्री एवम् दाङ क्षेत्र नम्बर दुईकी सांसद रेखा शर्माको प्रमुख आतिथ्यमा कार्यक्रम गरी सामूहिक न्वारन गरिएको थियो । कार्यक्रममा प्रमुख अतिथि शर्माले यति धेरै सडकआश्रित मानवको स्याहार र संरक्षण गर्नु आफैंमा महत्वपूर्ण भएको उल्लेख गर्दै अलपत्र गर्भवती महिलाको उद्धार गरी बालिकाको नयाँ जीवन आरम्भ गराउनु थप पुण्यको काम भएको बताइन् ।

मानसिक सन्तुलन गुमाएर सडकमा अलपत्र परेकी महिलामाथि समेत यौन दुव्र्यवहार गर्न पछि नपर्ने अपराधिक प्रवृत्तिलाई परास्त गर्नु समाजकै दायित्व भएको बताइन् । आफूले सेवा घरसँग नजिक रहेर काम गरिरहेको उल्लेख गर्दै उनले आगामी दिनमा पनि सहयोग गर्दै जाने बताइन् ।

यसैबीच सेवा घरको सञ्चालनलाई सहज बनाउन माघ १८ गतेदेखि महायज्ञ लगाइने भएको छ । महायज्ञको तयारी पूरा भएको संयोजक चन्द्रराज पन्तले जानकारी दिए ।