नेपाली काँग्रेसका नेता प्रदीप पौडेलले चार महिना पछि हुने संघीय तथा प्रदेशसभाको निर्वाचन अहिले प्राथमिकतामा रहेको बताए । सोमबार केन्द्रीय पार्टी कार्यालय सानेपामा बसेको काँग्रेस केन्द्रीय समितिको बैठकबाट बाहिरिने क्रममा उने यस्तो बताएका हुन् ।

नेता पौडेलले चार महिना पछि हुने संघीय तथा प्रदेशसभाको निर्वाचन अहिले काँग्रेसको एकमात्रै प्राथमिकता रहेको बताए । उनले भने, ‘चार महिनामा निर्वाचन हुँदैछ। त्यसमै काँग्रेस लाग्नुपर्छ। काँग्रेसको एक मात्रै प्राथमिक विषय निर्वाचन हो। पार्टीभित्र वृहत एकता कायम गर्नुपर्छ। भ्रातृसंस्था लगायतका सबै समस्या निमिट्यान्न हुनुपर्छ।’

काँग्रेस केन्द्रीय समितिको बैठकमा स्थानीय तह निर्वाचन परिचालन समितिका संयोजक तथा पार्टी उपसभापति पूर्णबहादुर खड्काले प्रतिवेदन प्रस्तुत गरेका छन् । बैठकमा अहिले निर्वाचन प्रचार समितिका संयोजक प्रकाशशरण महतले प्रतिवेदन पेश गरिरहेका छन् ।

नेता पौडेलले पार्टीको आन्तरिक जीवनका सवै समस्या समाधान हुनेगरी बैठकमा निर्णय हुने बताए । उनले बैठकमा नेतृत्वलाई थप बलियो बनाउने र सबैलाई समेट्ने गरी निर्णय हुने बताए । यस्तै बैठकमा गठबन्धनको समिक्षा, आगामी निर्वाचनमा गठबन्धन गर्ने वा नगर्ने बिषयमा पनि छलफल हुने उनले बताए । उनले सरकारले गरेका अलोकप्रिय निर्णयका बारेमा पनि छलफल हुने बताए ।