नगरकोटमा बाटो बिराएर जंगलमा हराएका भारतीय पर्यटकको उद्धार गरिएको छ। नगरकोटस्थित मुहानपोखरी रानीझुला क्षेत्रबाट शनिबार साँझ हराएका तीन भारतीय पर्यटकसहित चारजनालाई सकुशल उद्धार गरिएको हो।

आइतबार बिहान करिब पौने ४ बजे उनीहरूको सकुशल उद्धार गरिएको चाँगुनारायण– ६ का वडाध्यक्ष धनबहादुर लामाले जानकारी दिए। उद्धार गरिएका भारतीय पर्यटकहरूमा पति–पत्नी नितिन तिवारी, रश्मि तिवारी र उनीहरूका छोरा तनिस तिवारीका साथै नेपाली गाइड हरिप्रसाद खरेल रहेकाे वडाध्यक्ष लामाले जानकारी गराए।

उनीहरू जंगलमा हराएको खबर प्राप्त हुनासाथ स्थानीयसहित नेपाल प्रहरी, सशस्त्र प्रहरी र नगर प्रहरीको टोली खोजीकार्यमा जुटेका थिए । गएराति पौने १ बजेको समयमा हलहले खोप (खोल्ची) क्षेत्रमा अलपत्र अवस्थामा उनीहरूलाई फेला पारी उद्धार गरिएको वडाध्यक्ष लामाले बताए।

चाँगुनारायण नगरपालिकाका प्रमुख जीवन खत्रीले शनिबार साँझ मुहानपोखरी रानीझुला पुलबाट विदेशी पर्यटकहरू बाटो बिराएर जंगलतर्फ पसेका जानकारी गराउँदै खोजीकार्यमा सहयोग गर्न सामाजिक सञ्जालमार्फत अनुरोध गरेका थिए ।