गोरखा । विद्यालयमा शिक्षक दरबन्दी कटौती गरेको विरोधमा भीमसेन थापा गाउँपालिकाको कार्यालयमा तालाबन्दी गरिएको छ ।

भीमसेन थापा- १, मसेलस्थित दुल्लभ माध्यमिक विद्यालयको हाल भइरहेको विज्ञान विषयको मावि दरबन्दी कटौती गरेको भन्दै आइतबार अभिभावकहरुले तालाबन्दी गरेका हुन् ।

उक्त दरबन्दीमा रही विद्यालयका सहायक प्रधानाध्यापक राजु नेपालीले विज्ञान विषय पढाउँदै आएका थिए । विद्यालयको आवश्यकता नबुझी पालिकाले मनपरी ढंगले दरबन्दी कटौती गरेका कारण तालाबन्दी गर्नुपरेको विद्यालय व्यवस्थापन समिति अध्यक्ष रोशन गुरुङले बताए ।

‘विद्यालयमा विज्ञान विषय पढाउने जम्मा दुई शिक्षक मात्र हुनुहुन्छ, फेरि विद्यालयमा जम्मा दुई वटा मावि दरवन्दी छ,’ उनले भने, ‘विद्यालयको आवश्यकता नबुझी त्यही जनशक्ति पनि कट्टा गरेपछि समस्या भयो ।’