बलात्कार विरुद्धको जाहेरी प्रहरी वृत गौशालाले दर्ता गर्न अस्वीकार गरेको छ । २०७९ वैशाख २२ मा बलात्कार भएको सूचना पाएपछि वृत गौशालाबाट खटिएको प्रहरीले चावहिलबाट ७५ वर्षका आरोपी वासुदेव अर्याललाई पक्राउ गरेर लगेको थियो ।

६४ वर्षीया पीडित महिला र उनका आफन्तले पटक–पटक जाहेरी दर्ता गर्ने प्रयास गरेपनि प्रहरी वृत गौशालाको मुद्दा शाखाका अधिकारीहरुले ‘दर्ता गर्न मिल्दैन’ भनेर उनीहरुलाई फिर्ता गर्ने गरेका छन् । आरोपीले चन्द्रनिगाहापुरमा रहेको १४ धुर जग्गा दिनुपर्ने देखिएपनि उनले आनाकानी गरेको र चावहिलस्थित एउटा लजमा बोलाएर बलात्कार गरेको पीडित पक्षको आरोप छ ।

बलात्कार आरोपीलाई प्रहरीको १६९ नम्बरको मोबाइल भ्यानमा राखेर ल्याए पनि मिलापत्रको प्रयास गरेको थियो ।